قصة خادم العهد (كامله)

الجزء الأخير

وصولك للكتاب ده معناه اني مت ، ومعني اني مت انك ورثت ، انا رماح او رمزي زي ماتحب تقول يا شريف ، انا ابوك اللي شك في انك ابنه في يوم من الايام ، عارف انك محتاج تفهم ، بس صدقني لو كنت حاكيتلك ياكنت هتتبري مني يا هتوديني مصحة نفسية ، يارب تكون وصلت للكتاب ده منغير ما يكون حد جراله حاجة اما لو حد جراله حاجة فا انا اسف يابني ، مش هيروح اغلي من اللي راحوا ، هبدأ معاك الحكاية من بدري ، درويش الاصابجي يبقا خال امك ، من 15 سنة عيلته اتبرت منه وكلهم مبقوش يعترفوا بيه تبع عيلة الاصابجي ، ماعدا امك ، لانه كان صاحب فضل علي امك من 30 سنة ، لما اتجوزت امك الله يرحمها قعدنا 4 سنين مبنخلفش ، الدكاتره قالوا انها تمام وان الاحتمال الاكبر يكون العيب من عندي انا ، درويش طلبني انا وامك نروحله ، قالي اني معمولي عمل وعملي جلسه وفكه ، وجيبنا اخوك الله يرحمه من 30 سنه وبعد 9 سنين جيبناك ، في الاول كان مبتدأ وعيلته بتحاول تمنعه ، لكن اما فقدوا السيطرة عليه وبقا ليه شنة ورنة في البلد قرروا انهم يقطعوا علاقتهم بيه من 15 سنة ، وامك رفضت ده وقررت انها تقاطعهم ، واظن انك تفتكر انها مكانتش بتسافر لعيلة ستك غير لما يكون ميتلهم ميت ، اهو الاصابجي اللي خلاني اخلف ، العهد اللي عهده مع الجن كان مرتبط بقطع نسله ، علي الرغم من فرض شرط توريث العهد ، الغرض ان اللي يعمل العهد يخرجوا بره عيلته عشان ميبقاش غرض سُلطة إلا لو كان عمل العهد وهو مخلف ، من خمس سنين درويش طلبني في التليفون وطلب اني اروحله السويس ، روحت لقيته مجهز اوضة جنب اوضته مكتوب عليها رماح ، ولما سألته مين رماح ، قالي انت رماح لازم الاسم يتغير عشان محدش يدور وراك ، دخلت معاه لقيته طلع كتاب اسود مزغرف بكلمات من ذهب صافي ، اكيد هو في ايدك دلوقتي ، الكتاب اسمه خُدّاَمْ ظَاَمْ ، وبدأ يشرحلي ، ظام ده ملك من ملوك الجن يهودي الدين بيظهر في شكل قط اسود كان من المتمردين علي سليمان ، ليه عدد كبير من الخدام الجن لكن مشكلة خدامه إنهم ضعاف ، عشان كدة عهده مبيطلبش قرابين طائلة ولا كفر صريح ، كل اللي بيتم ان قصاد كل خادم تاخده لخدمتك تجيب قط اسود تخلي خادم تاني يلبس القط وتطلق صراحه ، وبكدة انت وهو مستفادين ، انت استفادت خادم وهو استفاد جسد حيوان يقدر الخادم بتاعه يتحرك فيه وينشر شره ، القربان كل اسبوع يتم ، بتجيب القط تحضر علي خادم وبعده تجرح ضهر القط بسكين والدم اللي ينزف تحضر عليه خادم تاني وتشرب الدم ده ،

وتقدر متشربوش وتخسر الخادم بس القربان لازم يتم ، لانه لو متمش احدي افراض نسلك يموت ولو مفيش نسل ، بيظهر خادم من الخدام للي حواليك بأبشع مظهر ، يتسببلهم في فزعة توقف القلب ، الخادم تقدر تستخدمه في الاستطلاع علي الحاضر ونقل الاخبار وتقدر تستخدمه في التسليط علي شخص لمدة شهرين يظهرله في احلامه ، وممكن تستخدمه في تحضيره علي قط اسود لكن يبقا ليك مش لظام وممكن لو خادم قوي تحضره علي اي قط ، وتطلق القط ده في الشوارع والبيوت ، يبقا عين ليك في مكان تاني ، ويقدر يكشف عن الانس ان كان معموله عمل ولا لا ، وفي خُدام اقوية يقدروا يعرفولك مكان العمل كمان ويجيبهولك ، وتقدر تستخدمة في تحضر ميمون بدون عهد دا بيساعد في إنجاب طفل لو الزوج غير قادرعلي الانجاب وبطريقة معينة بيتم الانجاب عادي والطفل سليم ، خلص شرح سألته انت بتقولي الكلام ده ليه ، قالي انه حاسس ان الموت قربله ، ولازم ينقل العهد ويورثه لشخص غيره وإلا كل الخدام اللي سخرهم بعد موته شغلتهم بس هي تعذيبه في قبرة وتهشيم عضمه بالاحجار ، وانه عايزني انا ابقا الوريث ، لعب في دماغي هو وامك بالسيط والشهرة والمقام في وسط الناس ، وفوق كل ده الفلوس اللي هاخدها من اللي جايين يتعالجوا ، وكمان كتبلي البيت اللي هو قاعد فيه وانت كمان قاعد فيه دلوقتي ، وافقت ، إداني الكتاب وقرأته وبدأت اتعلم واتقنت الموضوع ، لكن بصراحة يابني ، كلامه شككني في امك وفيكوا ، يوم ما درويش مات كان فاضل 3 ايام علي تقديم قربان ، قررت اني استني ومانفذش الاسبوع ده وانا عندي يقين اني هلاقي خادم ظهرلي في المكان لاني مليش نسل وانكوا مش ولادي ،

وانت كنت معايا في الشقة ، كنت مستنيه يظهرلك انت عشان تموت ولما يجي اخوك اموته و اموت امك ، لكن اللي حصل اني كنت غلطان ، ظهر لأخوك وحصله سكته قلبيه واتقلب بيه الميكروباص ومات هو وامك وهما راجعين من تالت يوم عزاء ، بصراحة الصدمة لما عرفت كانت صدمتي في نفسي و في ظني ، لو انا اتشليت واتخرست وانا كنت متوقع ولو بنسبه بسيطة ان ده هيحصل يبقا انت تموت من الحصرة ، انا لا اتخرست ، ولا اتشليت ، انا بس كنت عايز انعزل عنك عشان ابقا حر لوحدي ، عشان اعرف اروح السويس من غير ما تكلمني تطمن عليا ، متجيش في يوم تقولي نخرج نشم هواعشان متقطعش عليا مشاويري ، لكن من سنة بدأت احس ان الموت قربلي ، زي ما درويش حس قبلها بسنة ، قررت اني ابطل وفضلت اقدم في القرابين منغير ما اقبل خدام ، حسن قطة انا ضاحك عليه ومفهمه اني لبست في العهد بالغلط وكنت بدفعله فلوس رمزية ، معاشي وعليه 300 جنيه منك ، كل اسبوع بيجيبلي قطة من باب العمارة الخلفي وانت نايم او في القهوة ، انا استنيت سنة كاملة عشان اكتبلك الكلام ده وكل يوم بحس ان الموت قرب اكتر ، دلوقتي انا حاسس انه خلاص في وشي ، هروح اخر مشوار ليا للسويس عشان احطلك الكتاب ، انا هوصي حسن يراقبك لو انا مت ولما توصل لكتاب خُدّاَمْ ظَاَمْ يكلمك انك تدور عن مذكرات رماح ويقولك رقم الخزنة وهو عارف هيعمل ايه بعد كدة ، وده في مقابل انك هتشتري منه القطط بسعر اغلي ، متشال في البنك فلوس متتعدش والعربية والشقة وبيت السويس بالارض اللي حواليه ملكك ، وملكك 146 خادم فيهم 6 بقوة كبيرة ، وفيهم 10 متحضرين علي عشر قطط لما تنفذ العهد هتقدر تتواصل معاهم وتشوف هما بيشوفوا ايه وتقدر كمان تحركهم ، وكل ده ملوش عازه منغير ملكك لناس بتؤمن بيك وبالبركة اللي فيك ، مجرد ما تنفذ العهد هتتفتحلك ابواب جنة الدنيا ، الكتاب اللي معاك فيه كل حاجة انت محتاجها ، وهيعلمك كل حاجة”

الرؤية وضحت ماعدا نقطة واحدة ، ليه ابويا انتحر

والاجابة عند حسن قطة

اما بالنسبة للكفر ده فا انا معنديش ادني استعداد اني انفذه

قطع حبل افكاري صوت عالي جاي من برة البيت

خرجت لقيت فوق ال1000 بني آدم واقفين يهتفوا بأسم الشيخ مسعد رماح

بما ان ابويا رماح يبقا انا مسعد

في واجهة الناس دي لكن أنا أسمى شريف بس زي ماإنتو عارفين لازم الأسم يتغير علشان محدش يلاقي حاجه ورانا المهم لقيت وتحت رجلي التربي متربط

احساس السلطة حلو جداً

كل البشر دي تحت اشارة مني

لقيت الموبايل بيرن وكان حسن

رديت عليه قالي “الناس دي عايزة كرامة ، القط في شنطة العربية”

لفيت من ورا البيت جيبت القط

دخلت بيه الحمام

وبدأت اقرأ عليه طلسم التحضير

(متقرأش بصوت عالي)

“ظَاَمْ ظَاَمْ ظَاَمْ ظَاَمْ ظَاَمْ ظَاَمْ ظَاَمْ إحضروا ايها الخُدّاَمْ إحضر خادم القط الاسود إحضر للقط الاسود واطلق اعين ظَاَمْ في ارض الكافرين بمُلك ظَاَمْ إحضر بحق سلسلة سليمان لحاكمك إحضر بقسم الليث واللاروث إحضر بقسّم ساروخ فعهدنا محفوظ وقربان حاكمك محفوظ ظَاَمْ ظَاَمْ ظَاَمْ يا قط الليل والظلام ياملك ملوك الخُدّاَمْ إحفظ لي عهدي المصون بقربانك الموثوم ثيناچ دچ برتيهان موّثوم ظَاَمْ”

عين القط بدأت تلمع

الضوء بدأ يرعش

ظهر وراه نسخة طبق الاصل من اللي شوفتها في كاميرا الجيم

جسم ضخم ووشه مشوه وريحته وحشه

لكني كنت مبسوط بيه ومخوفتش منه

الضوء رعش تاني واختفي

وحرفيا القط إبتسملي

طلعت السكينة وجرحت ضهر القط وهو لسة مبتسم ونزلت الدم في الكوبايه

فتحت الباب للقط علشان يمشي

مسكت الكوبايه وبدأت احضر خادم ليا انا

(طلسم متقرأش بصوت عالي ولو عاوز تعديه مفيش مشكلة)

“مراحم مراحم مراحم چمام دچ مراحم ظَاَمْ دريان مراحم غراث انا تحت حكمك وتحت عرشك وتحت قوتك ورحمتك يا اعظم الملوك ، انا كافر بكل ما لا تؤمن انت به ، اعطني مما تملك فأنا ذليلاً لك يا سيدي ظَاَمْ ، اقسم بشاكوش البرجاچ ومنحرف الادباچ قرطش براقش بطش لليد اليسري خادم لليد اليمني العهد المحفوظ”

وشربت دم القط

وسمعت صوت بيتكلم في ودني الشمال بيقول

حضرت في يسراك الان خادمك الوفي سمعان أطلب ما بقدرتي

وفعلا طلبت اللي بقدرته

خرجت للناس

بعد مالبست الجلابية والعباية الصوف والعمة ، وقولت بصوت عالي إحضر يا سمعان

خرج من ورايا في هيئة قط اسود

انا الوحيد اللي شايفة علي حقيقته

قولت بصوت عالي إهمس يا سمعان

همسلهم في ودنهم الشمال بإسمي “مسعد”

حسن قال بصوت عالي جداً الكراااااامة

500 بوسة في ايدي اليمين

و500 في الشمال

وفي ناس كانت بتبوس رجلي

شاورت لحسن يجيلي وقولت للناس تمشي ونبدأ من بكرة

دخلت انا وحسن وقعدنا في غرفة رماح

سألته ابويا انتحر ليه

قالي “قدره كده ، اليوم ده كان المفروض ابعتله قط ، طلبت منه زياده رفض وعاشلي في دور الشحات ، فكر اني هرجع في كلامي ، نشفت دماغي ، لقيته الساعة 11 بيكلمني ويتحايل عليا اجيب القط بأي سعر لان لو عدت 12 شريف اللي هو انت هيموت ، وانا مكنتش هنا وكان صعب اني اوصله ، معرفش يتصرف انتحر عشان انت متموتش”

قولتله “وانت بقا كنت فين ساعتها يا حسن”

قالي “كنت مطرح ماكنت يخصك في ايه ، دلوقتي انت شوف هتتفق معايا علي كام وسيبك من ال3000 اللي ابوك كان بيدفعهم دول انا كنت فاكره صاحب ظروف ، انا عندي مزرعة قطط سودة فيها فوق 5000 قط وبتعامل مع اكبر السحارين والفكة دي متلزمنيش”

قولتله “عايز كام يا حسن”

قالي “35 الف جنيه لكل شهر ، وخلي بالك انا الوحيد اللي تضمن ان قططه طاهرة مش ملبوسه لاني بادئ المشروع بدكر ونتايتين نضاف ومحصنهم”

قولتله “موافق بس عايز مقدماً دلوقتي 10 كلهم نتي وفيهم دكر واحد عشان هحضر عليهم وهحاسبك عليهم ب90 الف”

قالي “مسافة السكة اكون عندك”

ومشي

بعد ما مشي فتحت تليفوني واتصلت بمندوب الشركة ووعدته ان الفلوس بتاعة العربية هتوصلهم بكرة وانهم يلغوا المحضر وفهمته اللي حصل وقدر الموقف

بعد 3 ساعات حسن رجع ومعاه العشر قطط

قولتله “إقعد ياحسن عشان عايزك في موضوع”

قالي “خير”

قولتله “الاول بس انت ليه حاطط المزرعة في صحرا ومنغير حراسة ، مش خطر ، ولا هي عشان مفيهاش غير 398 قط تهمل فيها”

بصلي بغضب وقالي “انت بتراقبني”

قولتله “عادي ، مانت راقبت ابويا اما جه بالكتاب لهنا عشان تعرف المكان وتعرف النمرة اللي هو قالهالك بتاعة خزنة ايه وفين”

قالي “مانا كنت بتغفل بقالي اربع سنين”

قولتله “مش هتقولي كنت فين يوم ما ابويا انتحر ، اقولك انا ، انت كنت هنا ، بتفتح الخزنة وبتقرأ الكتاب ، وعرفت ان تحت القبة شيخ فا استعجلت قدر ابويا ، وبما انك انسان فاشل ومش قادر تنمي مزرعة قطط ومش عارف تشتغل مع شيوخ تقال فا قولت تستغل المبتدئ اللي مش عارف حاجة ، بس احب اقولك انك لو كنت تعبت نفسك وبدل ما جيت هنا تقرأ مذكرات ابويا وسط الكاميرات اللي مرشقة في المكان وكنت دخلت الشقة بتاعتنا بالمفتاح اللي ابويا اداهولك واخدت كتاب تحضير الخدام نفسه ، كنت هتفكر الف مرة قبل ما تلعب معايا ، حظك ان ابويا كان تايب ، وفقرك انك خسرتني اغلي تلت اشخاص في حياتي ، ووكستك اني جديد وعايز اجرب”

مسكته من رقبته وشديته رميته في الحمام

وحضرت خادم منهم يدخله يونسه

حضرت خادم اسمه رامح من خُدّاَمْ ظام

وقفلت الباب عليه

وطفيت النور

وقعدت علي الكرسي وانا بستمتع بصوت صراخه

شيء ممتع مش كدة

انا كمان كنت وقتها مبسوط جدا

ومن بعدها عملت مزرعة قطط لنفسي وبقا بيجيلي ناس من بره مصر

ونقلت من محافظة للتانية

دلوقتي بقا عندي 30 سنة

وبقيت املك 578 خادم

واتجوزت ندي وتوبتها من دروس الدقي

مهي الموكنة طلعت موكنة المذاكرة بتاعتها هي واصحابها الدحيحة

ابويها مفكرش في شيء غير الفلوس ورماها منغير ما يعرف عني اي حاجة

خلفت 3 عيال

بس مش مني

مش هفسر لكني بقيت عقيم ودول جايبهم منظرة بطرق غير مشروعة

لكن الحقيقة انا معنديش اولاد

مليش نسل

مع ان نفسي

حابب بقا اسأل سؤال

اعتبرني بعرض عليك انك تورث العهد من بعدي

وتملك اللي انا بملكه

هتوافق

هتقول لا

لكن دور جواك كويس

هتلاقي جزء كبير منك يتمني السلطة والنفوذ والفلوس

مقابل تضحيات بسيطة

عقم

وقطة كل اسبوع

فكر بحكمة وقولي رأيك

يمكن لما احس ان الموت قرب

اختارك

انا موجود معاك في كل حتة

في الشارع

في الشغل

في البيت

في الحمام

في القبر

انا كتير

انا الف حاجة علي بعضها

فكر وقرر

يمكن تبقي انت وريث الكنز

كتاب خُدّاَمْ ظَاَمْ

تمت.